بنت العمدة /بقلم ابو حمزة رشوان

 بنت  العمدة  لو  حباك..

شهر امشير راح يبقى كياك..

والكرات  يصبح. ياسمين..

مين راح يقول انك عكاك..

عش غراب على عش يمام..

البطيخ  نفس  الشمام....

مياة واحدة الكل تمام..

وبنت العمدة لو حباك..

كل  البلد  تقول  حياك...

اتشيل  ابوزيد  وتحط  عبيد..

العمدة بنفسة يفك القيد..

فارس خيل بقلب حديد..

وبنت  العمدة  لو حباك...

كل  الغفر  تمشى  وراك...

طبل  طبل عمى أمين...

رقصة وهزة يا ست شرين..

غنى غنى يا عم ياسين..

بنت  العمدة  لو حباك..

على طبلية العمدة غداك...

تعمل  كوكتيل  لحمة  وفول..

عدس ومشمش ومعاهم كحول.

رمان على ثوم تصبح مسؤل..

وبنت العمدة لو حباك...

شيل من هات وحط فى ذاك..

الاول يركن على الرف....

والثانى نقول عقله خف

ويتبدل بالمقبول فى الصف..

وبنت العمدة لو حباك...

يبقى من حظك ومناك...

مين يفتح حنكه ويتكلم..

الصبى ويانا يبقى معلم...

وعلى مامور القسم نسلم..

وبنت العمدة لو حباك...

الكل يطمع  ويطلب  رضاك.

أحمد ومصطفى وإبراهيم..

مرقص   وحنا   ونديم...

ماجدة ونادية ومعاهم ريم..

بنت العمدة لو حباك.. 

مصباح علاء الدين معاك..

من بعد المش والفجل..

تحط الرجل على الرجل..

وكل يوم يندبح ليك عجل..

بنت  العمدة  لو  حباك....

كسر خرب كلة فداك...

عزيزة تلبس طربوش...

وحسنين فستان منفوش..

مسرحية وبنغير فيها الوشوش.

وبنت العمدة لو حباك...

تبقى بسرعة نجم شباك..

تكتب شعر كلام وخلاص..

شعرك يصبح طلق  رصاص..

وجمهور يحلف واد قناص..

بنت العمدة لو حباك...

مين راح يقول انك عكاك..

((بنت العمدة   بقلم أبو حمزة رشوان))